Scho am Morge am 3:20 isches mitem Car losgange nach Lausanne. Mit eme Umweg hend mer euse Platz für de hüttig Morge gfunde und scho isches mit de erste Dispizline losgange. De Uftakt het Pendelstaffette, Steihebe und Speer gmacht. Während em ganze Tag isch immer wider d Herusforderig gsi, zum richtige Zitpunkt de richtig Ort z finde – insbesondere wil oft sehr volli Büs s Transportmittel zwüschet de verschidene Diszipline gsi sind. Mir hend eus aber trotzdem erfolgrich mit live-Standört zum Schlüderball und Hochsprung verschobe. De Teamspirit isch wie immer sehr hoch gsi und es sind au einigi neui PB‘s erreicht worde. Nachem 800 Meter und Wurf sind mer witer zum 400 Meter, Kugelstosse, Witsprung und Steistosse. S Wetter isch schön und warm gsi und so sind mer nachem LA-Teil vu dem Wettkampf gern in See gsprunge. Nach dere Pause isches mit de Gymnastik witergange und de Abschluss vum Wettkampf het denn d GK gmacht. Au am Fest und am nächste Morge zum uf de Zug gah hend sich d live-Standort wider als sehr nützlich usegstellt. Au am Sunntig am Bahnhof hend mer na chli laufe müesse – ih dem fall so z sege eimal im kreis, zum denn wider am gliche ort usecho wie mer losgloffe sind. Mer hend denn aber derfe in Zug ihstige und hend sogar in de 1. klass fahre derfe. In Wiesedange sind mer denn festlich empfange worde, mit allne durs Dorf gloffe und nach enere Red hend sich einigi im Brunne abküehlt während anderi sich im Leue verpflegt hend. Gmeinsam hend mer de Abig usklinge lah und di letste Sunnestrahle vu dem Tag gnosse.
