DR Reise 16.-17. September 2023
21 motivierti Turnerinne hend sich für die diesjährigi Dameriegereis agmolde. Am 7.30 hemmer ois am Bahnhof z’Wiesedange troffe. Nacheme chline Halt im Coop z’Winti simmer denn scho mitem Zug richtig Baar gfahre. Im Zug het sich denn d’Claudia freiwillig gmolde zum de Bricht schribe. Claudia? Welli Claudia? Leider hani mit Schrecke müsse feststelle, dass mir gar kei Claudia i oisere Dameriege hend und die leider vo de Fraueriege es Abteil nebed ois de Bricht schribt. Jänu mussen halt glich ich schribe…
Z’Baar acho simmer mit eim Lärm empfange worde. Bi de Trillerpfiffe vo de SBB chunsch ja en halbe Tinnitus über. Jetzte chömemer zu mim absolute Highlight vo dem ganze Wuchenend. De Grund wieso mir oise Alkoholkonsum bis jetzt hend müsse im Rahme bhalte und das geliebte Formular underschribe heted sölle mitneh, will ohni das gahts nöd. Ja vieli wüssed was ez chunnt. Endlich s’gfiirte Töfflifahre staht ufem Programm. Stelled oi vor, soviel Fraue, soviel Frage und soviel geili Maschiene… Obs en Crash geh het?! Ja. Obs Verletzti geh het?! Ja. Defür wüssed mir jetzt, dass Slipilage vielsitig verwendbar sind. S’Tüpfli ufem I sind die Jeanswestene gsie, wo denn die ganz Mannschaft agleit het, demit mir ois au ja nöd verlüred.
Nacheme chline Halt z’Immensee für de Z’Mittag, isches denn au gli wieder wiiter gange. Eimal um de Zugersee – die Ussicht isch eifach de hammer. En grosse Applaus a oisi jüngste Bibelis, die hend die ganz strecki mitem E-Bike gmeisteret. Wiiter isches in Kanton Argau gange. Det sind mir z’Emmetten mit de Gondle ufe und vo dete her, de nöd ganz Chinderwaage tauglichi Weg zu de Stockhütte gloffe. Nachem feine Znacht hets denn die Einte zum Spielimache verleitet und die Andere hend lieber welle de Spielplatz go erchundige und die grossi, gfährlichi Rutschbahn go bewältige. Für en churze Moment hemer a dem Abig doch alli eifach wieder welle Chind sii. Das het meh den vorallem bim all jährliche 15-14 wieder gseh. Nacheme doch nöd all zu strenge Tag simer denn doch recht uf de Schnorre gsi und darum echli früehner is Bett als auscho. 8:00 am negste Tag: Es sehr entspannts Verwache mitem Crazy Frog Klingelton und eme wunderschöne Panoramablick. Das het de Sunntig mitem Z’morge eifach herrlich gmacht.Für die eint oder andere nöd ganz so entspannt isch d’Fahrt mitem Trotti durab gsi, da de Zitplan doch sehr sportlich berrechnet gsie isch. Aber mir sind ja schliesslich Turnerinne und kei Fuessballerinne. Vo dem her keis Problem. Nachere chline Busfahrt isches denn grad zur nächste Destination gange. Nämmli uf e Schiffsfahrt ufem VierwaldstätterseeD’Endstation isch denn z’Luzern gsi.Was au immer die det für e Fest gha hend a dem Wuchenenend. Mir hend denn au die eint oder andere Liiche agseh gha. Vorallem a dem Probedance na wos uf de Bühni vorzeigt hend, hemer nuna Frage gha.
Es gaht witer an Flughafe, wos denn e meh oder weniger spannendi Füehrig geh het. Leider sind nid alli Füehrer so motiviert gsi wie anderi mit soviel Fraue gsi wered. Aber he, bitte lueged doch das ihr nächst mal bi de richtige Airline s’Gepäck aufgebed er hets ois schliesslich 3x gseit. Jetzt gahts au doch scho uf d Heimreise mit Zug und BusLeider hets da Jahr kein Bsuech im Löwen geh, doch es sind sowieso alli fix und fertig gsi vo dem Wuchenend.
Danke a dere Stell am Vorstand für die grossartigi Organisation Es isch e super Wuchenend gsi.
Turnerischi Grüess gönd use, euri Sarina.
