Am Wiländer sind mer in zwei Gruppe gstartet. Di erst Gruppe het scho am Morge am 7ni müesse parat stah und scho am 8i mit Ring gstartet. Nacher isches witergange zu Witsprung, wo jedi Turnerin mindestens 2 gültigi Ergebnis gschafft het. Nachem gumpe isches bi Chugle mit stosse witergange. Bi Hochsprung hets es paar neui PBs geh und als letsti LA Disziplin isch denn na de Sprint choo. Nachher sind all is Grätgwändli ghüpft, sind über d Bodebahn gwirblet und hend ihres Könne am Stufebarre unter Bewies gstellt. Und so isch de – für vieli us dere Gruppe – 1. Wiländer us sportlicher Sicht scho fertig gsii.
Di zweit Gruppe het chli länger schlafe derfe und het de Wettkampf am 1 mit Schaukelring und Sprung gstartet. In de chline Turnhalle in Nüfere isch das eh seehr kuscheligi Ahglegeheit gsi wil au na Bock, Pauschepferd, Reck und en Männerbarre dete zum turne gsi isch. Aber eusi Dame hend sich guet uf sich selber konzentriert und di erste Diszipline super gmeisteret. Nachher isch Witsprung gfolgt und es sind alli recht happy gsi, dass de Rege chli nahlah het. Nichtsdesto trotz hend mer en sehr kunstvolle Sprung beobachte derfe. Wil Chugle verspätig gha het, sind mer zersch zum Sprint, was trotz nasser Wise super Ergebnis ihbracht het. Wo au d Chugle gstosse gsi sind, hend mer zum Hochsprung gwechslet, wo d Turnerinne denn leider so richtig duschet worde sind und wil d Matte so nass gsi isch au grad badet. Nachher hend mer aber in di trochene Grätgwändli wechsle derfe und witer isches gange mitem Bodeturne. Da hend mer sogar es 10ni fire derfe! Als letsti Disziplin isch Stufebarre choo und nachem dusche het eus d Sunne denn sogar na es bizzeli entgege glacht 🙂
Alles in allem isches en sehr guete Wettkampf gsii mit sehr guete Resultat – und zum zuelose isches definitiv au lustig gsi, wil einigi Persone d Chance gnutzt hend und effektiv vor de Diszipline entschide hend, was sie turne wennd oder welli Teili sie zeige wennd.
Mir bedanked eus für d Organisation vu dem Wettkampf!
