Wyländer 2021 in Dinhard
Am Morge am 7bni hend sich siebe Fraue mitem Velo troffe. Zum grosse Erstune isch sogar d Laura pünktlich gsi 🙂 und scho het de sportlichi Tag gstartet mitere Fahrt uf Dinhard. Kimberly isch au mitem Velo cho eifacht vo Henggart her. Oisi Sache hemmer im Festzelt deponiert, denn simmer los ois go ufwärme samt achti renne zwüsched bänk und über es paar Stange hüpfe und balanciere. Oisi erst Diszplin isch 80m Renne gsi, d Sanja isch denn au no husch mitgrennt, das niemert muen ellei renne. Witer isch es gange mit Bode turne, det hets paar lustigi Grimasse gä, insbesondere bim Spagat. Oisi Dame hend au wunderbar Barre turnet und super Note übercho! D Kulisse bim Barre turne isch bsunders idrücklich gsi. A de Ring und bim aschlüssende Sprung ischs au rund gloffe. Denn simmer bim Wiit acho und det het sich leider bim igumpe Tanja verletzt, aber wiemer sie kenned isch sie mega tapfer gsi und het chum s Gsicht verzoge. Nachme churze Ufenthalt bi de Sanität und me wunderschöne Chüelverband am Bei het sie denn no ihri letscht Disziplin mit de Chugle chönne absolviere. De krönendi Abschluss hemmer denn no bim Hoch gha mit de Sanja und de Laura, wo beidi höcher gumpet sind als sie sichs erhofft hend 🙂
Als Turnerinne hend foif en 5-Kampf gmacht: Michaela, Laura, Tanja, Sanja & Erina
Drü Dame hend en 3-Kampf gmacht: Angela, Sarina & Kimberly
Als Kampfrichertinne simmer vo de Stefanie und de Michaela vertrete gsi.
Am Nammittag sind die einte no go kampfrichtere, mit de anderne go mitfiebere oder d Gymnastik go bewundere. Als erschts hend die meiste e vernünftigi Stärchig us de Chuchi brucht oder e Erfrischig vo de Duschi. Bi de Rangverkündigung am Abig hemmer denn erfahre wiemer ois gschlage hend. Oisi foifkämpferinne sind all ufenand folgend gsi vom Rang 21.-24. 🙂
De Abig isch denn no usklunge worde im Feschtzelt und spöter au no i de Bar.
Mit Turnergruess
Kimberly als Vertretig vo de Sina
