Scho am 7bni am morge händ mir eus bim brüggli mit em velo troffe. Nach 15 minute sind mir alli bim dütweg acho und händ eus en platz gsuecht. Bim iwärme hät s rösslirenne und s abklatsche nöd därfe fehle. Agfange händ mer mit einere gruppe mit schlüderball. Trotz nasser wiese und schlüderball händ alli über 20 meter useghaue. Wiitergange isch es mit 80 meter. Die siebe läuferinne sond erfolgrich is ziel cho, eini leider mit fehlstart disqualifiziert worde. Bim wurf sind mer denn mit zwei gruppene gstartet. Nöd alli sind zfriede gsi mit ihrne resultat, aber insgesamt sind mer guet wegcho. Vor em wiitsprung händ di einte no d übergab für de staffellauft güebt. Mit em wiitsprung isch es am 11 wiitergange. Leider händ nöd alli en gültige gha, aber alli händ ihres beschte gäh. Nachher sind mer mit zwei gruppene bim kugelstosse gstartet. Mit guetne resultat sind mer wiiter an hochsprung. Alli händ det ä gueti höchi usegholz. Bi de 4 x 100 staffete hend mir s denn usegholt und wisi 1 hets s sogar is finale gschafft. Mit chli verzögerig denn d schwedestaffete wo mer au guet abgschlosse händ. Vor de pendelstaffete isch no d olympische staffete vom tv gsi und da händ mer matürlich alli enthusiastisch gfänet. d pendelstaffette isch sehr guet gloffe und vo dene wo nöd grennt sind isch flissig vom rand gfänt worde. Au bim tv händ alli luut grüeft. Bi de rangverkündigung händ mer paar priis chöne abstaube und nach eme chliine zwischestop bim mcdonalds und nachdem alles brot und alle salami weg gsi isch, händ mer eus wieder zrug richtig wiesedange gmacht.
Lara Bugeda
