Am 7:30 hemmer eus alli zemme am Bahnhof Wiesedange itroffe. Die einte pünktlich und anderi eher weniger;) Vo Wisi us simmer uf Winti gfahre, wos nachere churze Warteziit wiiter zum Bahnhof Schaffhuse gange isch. Nacheme churze Marsch vo de Bushaltestell simmer die Turnhalle itroffe, zu de Erliechterig vo allne, wills agfange het regne. Das isch leider meh oder weniger de ganz Tag so blibe… Nacheme lustige Fangis zum Ufwärme, hemmer mit de Pöschte derfe afange. Über de ganz Tag verteilt het mer chöne a verschiedenste Diszipline teil neh: Chugelstosse, Sprint, Hochsprung, Wiitsprung; Ballwurf, Gymnastik, Yoga, Hürdelauf, Speerwurf und zwüsched ine cooli Spieli.
Bsunders lustig ischs Yoga vo de Miggi gsi, wo mir hend müsse feststelle, dass eusi Manne sich öfters dehne sötted…
Natürlich hets en feine Znüni gehe, sogar miteme top dekorierte Geburtstagschueche.
Am Mittag hemmer eus alli zemme zum Restaurant ufgmacht. Leider simmer da alles andere als troche blibe…Nacheme feine „Gschnetzlete mit Spätzli“ simmer denn wieder gstärcht gsi für de Rest vom Tag. Satt und vollgesse simmer zrugg id Turnhalle spaziert und hemmer namal Vollgas gehe. Während die einte dusse Chugle gstosse (eigentlich me Boccia gspielt) oder Wiitsprung gmacht hend sind anderi wie wild am Hürdelauf trainiere gsi. Später hemmer no Hochsprung trainiert, woruf sich vieli gfreut hend, bis es denn het agfange schiffe… Aber au denn hemmer nöd ufghe! Währendesse hend die super ambitionierte Manne ihre 800er Lauf güebt, bis zum umgheie. Gans durchnässt und kaputt simmer id Halle zruggkehrt und hend eus umzoge.
Denn hemmer alli zemme miteme Bierli uf de erfolgrichi Trainingstag agstosse! Später simmer denn alli zemme ine Pizzeria go Znacht esse. Det hets Esse leider 2 ½ Stund Verspätig gha, was de Grund gsi isch, dass mir leider nöd hend chöne go chlettere. Drum sind denn, die wo hend welle, in Usgang gange und die restliche sind id Turnhalle zrugg, go ihri eigeni chlini Party z mache:)
Denn hemmer eus au scho igrichtet zum Übernachte, mit allne mögliche Gräte usem Grätruum. Es het extrem gmüetlich usgseh (meh als es denn gsi isch) und isch zimlich lustig gsi. Bald sind au die erste go schlafe, was so mässig guet klappt het. Irgendwenn isch Rueh ikehrt, bis die erste vom Usgang hei cho sind. Denn isch mer wieder hellwach gsi, will s ganze Liecht die Halle agange isch. Und das die nechste paar Stund lang… Jede het irgendwenn sin Schlaf gfunde und het sich bizli vom strenge Tag chöne erhole.
Am nächste Morge isch en chline Zmorge parat gsi. Nachher ischs wiiter gange mit trainiere, so guet wies gange isch. Nach paar wiitere astrengende Stunde hets Spätzli zum Zmittag gehe. Nachem Zmittag hemmer eus langsam as Packe und Ufruume gmacht. Denn wo jede sini siebe Sache ipackt het, simmer zum Bahnhof Schaffhusse gloffe und hei gfahre, wo mer direkt in Rege cho sind.
Müed, aber glücklich sind denn alli hei gange go wiiterschlafe oder uskatere…
