Am Samstig vum Einzelwucheend hend 7 motivierti Turnerinne ihres Könne unter Bewies stelle derfe. Eigentlich wered nur 6 ahgmeldet gsii aber wils spontan vor Ort na es Plätzli gha het, het di 7. Person fröhlich entschide, au na mitzmache. De Tag het mitem Turnwettkampf gstartet und s Wetter isch besser als erwartet gsii, was für na besseri Stimmig gsorgt het. Churz vor em Mittag isch denn d 4-er Gymnastik drah cho und am spätere Namitag isches mitem für eus letste Wettkampf am Samstig im Bereich Gräteturne losgange. Am Abig het en super DJ für eh eimaligi Stimmig gsorgt und d Turnerinne hend ihri super Leistig fire chönne. Am Sunntigmorge isches denn scho am 8i für d Liechtathletik 4-Kämpferinne los gange. Doch di früeh Uhrzit het nöd devo abghalte, super Ergebnis z erreiche! Gstartet sind d Turnerinne mitem 100 Meter, woruf zersch gstosseni Chugle, denn hochi und nachher witi Sprüng gfolgt sind. Als krönende Abschluss isch de 800 Meter an de Reihe gsii. Ca. eh Stund nachem Liechtathletik 4-Kampf het de Liechtathletik Sie und Er gstartet. Det sind total 4 Grüppli ahtrette. Au sie hend mit 9:12 als Startzit in Arbon nöd usschlafe chönne und au sie hend super Ergebnis chöne zeige. Bi ihne isches ebefalls mitem 100 Meter losgange, nachher sinds witer zum Hochsprung, Chugelstosse, Speer und Witsprung. De krönendi Abschluss vu dem Wettkampf het de 2000 Meter dargstellt. Wo das gschafft gsi isch, het meh d Männer am Namitag bim 6-Kampf ahgführet. Nachher het meh gmeinsam uf d Rangverkündigung gwartet und d Leistige hend meh als gnueg Grund zum Juble geh: Es sind insgesamt 7 Medallie erturnt worde! Herzlichi gratulation!
Tamara
