Am Sunntigmorge am 6i het oisi diesjährigi Turnfest-Saison gstartet. Mit gueter Stimmig,
begleitet mit luuter Musig hemmer ois ufde Weg nach Neftebach gmacht. Z Winti hemmer churz
no gmeint mr müend notfallmässig uf es Taxi uswiiche aber de Shuttle isch denn doch no
rechtziitig choo und het ois ufs Feschtgländ bracht.
Nacheme churze Iilaufe ischs für oisi Grätturner/inne bereits mitde GK losgange und oisi
Speerwerfer/inne hend ihres Können ufde Wurfalage derfe under Bewiis stelle. Nachher ischs
Schlag uf Schlag gange und mir hend ei Disziplin nach de andere absolviert. Einigi vo oisne
Athlete hend sogar noii Beschtleischtige chöne erziele. Chli nachem Mittag simmer bereits
mitem Wettkampf fertig gsii und hend zeme uf oisi guete Leistige agstosse. De Namitag hemmer
bime feine Bier ide Sunne verbracht und hend ufd Rangverkündigung gwartet. Dete hemmer
denn namal einiges z fiire gha. Ganzi 3 Mal hemmer de Regionalmeister-Titel gwunne. Im Speer,
800m und im Hochsprung! Herzlichi Gratulation für die super Leistige.
D Rangverkündigung het denn leider chli plötzli ufghört, will alli Turner/inne wegere Gwitterzelle
hend müesse evakuiert werde. Somit het sich die ganzi Menschemasse id Turnhalle verschobe.
Das het ois Wiesedanger natürli nid ufghalte zum s Fescht dete wiiter z füere. Solang bis vom OK
Entwarnig cho isch und mir ois ufde Heiweg gmacht hend.
Danke am RMS OK für die gueti Organisation und a oisne OTs für die Planig und Iteilig!
Täne
