Am Samschtig, 10.5. hämer mit em Munotcup id GK-Saison gstartet. Am 9ni hämer eus z Wisi am Bahnhof troffe und sind denn mit em Zug uf Schaffhuse gfahre. Zu eusem Glück hämer grad en Bus gha, wo eus uf de Munot bracht hät. Mir händ eus denn en Tisch usgsuecht mit chli Schatte und agfange frisürle. Bevor mir denn go ilaufe sind, hämer no schnell de erschti Teil vo de Sanja ihrem Transition Video müsse filme. S böckligumpe hät au nöd därfe fähle und zum Glück häts nume bi öperem es chlises Hose-Problem gäh, aber das isch denn souverän mit em Schuehbändel glöst worde. Nach em Umzieh hämer denn no de zweiti Teil vom Transition Video gfilmet. De erschti Durchgang isch denn bi de Einte chli besser gloffe als bi de Andere, aber insgesamt ischs guet cho. Ussert euse chlini Regelverstoss, wo denn doch keine gsi isch zum Glück. Bim zweite Durchgang isch es denn no chli besser gloffe.
Am Namittag am halbi 3 het sich den no es chlises Grüppli Turnerinne troffe, wo nume i de Gymnasik mitgmacht het. Mit em Zug sind den au sie uf Schaffhuuse gfahre, wobii unterwegs d Ziit für d Frisure mache gnutzt worde isch. Z’fuess isches den vom Bahnhof uf de Munot gange und nach de vielne Stege sinds scho fascht fertig ufgwärmt gsii. Uf Platz hend sich den d GK- und d-Gymlüüt troffe und hend d Ziit bis zum erschte Durchgang vo de Gym mit frisiere inkl. enere grosse Portion Gel, zueluege, esse und ufwärme verbracht. Nach em Sechsi hemmer de erschti Durchgang vo de Gymnastik gha. Alles in allem isches guet gange. Nachere churze Pause isches den vor em Siebni mit em zweite Durchgang wiitergange. Vor de Rangverkündigung isch no die letscht Challange dra gsii: d Leuemähne und d Hyänefrisure z entwiire und de Haarspray und Gel use z’bringe – aber au das het mit ere grosse Portion Shampoo klappt:)
Mir freued üs üf die wiiteri Turnsaison
Aline und Lara