Hüt, Samstig, 11.03.2023, am 09:02 Uhr hemmer eus uf de Weg gmacht.
All sind pünktlich gsie!
Trotz Schnee, trotz Sturm und mässige Navigierer hemmer de Weg uf Effi gfunde.
All sind sicher acho!
Mir sind go ilaufe, obwohl d Bedingige nöd überzügend gsie sind.
Nöd all hend freud gha!
Doch bi de erste Disziplin, am 30 Meter, sind au no di letschte Schneeflocke tröchnet.
All sind is Ziel cho!
Nach Spiis und Trank hemmer eus an Hochsprung getraut.
All hends grisse!
Churz druf abe sind d’ Chugle gfloge, di eine wiiter als di andere.
All: «Flieg Kugel, flieg!»
Bim Drühupf hemmer eusi Wädli brucht, genau wie eusi Schwiizer Skicracks a dem Samstig.
Nöd all hets gfreut!
Nach em schlimme Drühupf isch s no schlimmere Seiligumpe cho.
Nöd all hends grockt…
Jetzt ischs scho fast gschafft gsie, nur no d Pendelstafette het gfehlt.
All sind i de Startlöscher gstande!
Wo denn das au no gschafft gsie isch, hemmer eus es Bier nach em Wettkampf verdient gha.
Nöd all hend Durst gha!
Mit 3 Uszeichnige hemmer de disjährigi Hallewettkampf abschlosse.
Alli sind zfriede gsie.
En Bricht vo
De Laura & de Sanja
