DR Reisebericht 18.-19. September 2021
Am Samstigmorge – die einte meh oder weniger fit,
hemer euses Reisli gstartet mit meh Fahrte als Schritt
7i am Morge und mir hend scho agfange fiire und singe,
und hend so chöne de Tanja ihre Geburi aklinge
Ganz nach em Motto, erste Zug ersts Bier,
hemer agstosse, Täne: Alles Gueti wünschedmer dir!
Hend na anderi Turnverein im Zug atroffe,
und die wered glaub weg eusere Musig lieber grad devogloffe
Acho in Wengwald und nacheme Wanderusflug,
hemmer s’Gondeli gno, isch hald scho schöner als im Zug
Acho uf em Männlichen, hemmer euse Lunch hinderetischet und chli umetrollt,
anderi hend e rundi gnapt und die Stunde vom Usgang am Vorabig ufgholt
D’Wanderig bis Alpiglen het mer wükki nur chöne gnüsse,
usserd d’Erina het sich fasch welle in Chueflade schüsse (natürli usversehe)
Es het welchi geh wo wükki jedi Pause als Nap gnutzt hend,
und anderi wo barfuess ide Adilette im Rege laufe wänd
Mir sind hald e lustigi Volksgmeinschaft,
jedem das seine, das hemer hald grafft
Acho i eusere eigete, gmüetliche Herberge,
het ei Duschi für all mösse lange, wie bide Zwerge
Spöter isch denn d’Sarina mit ihrem deluxe Taxi nacho,
feins Esse mit gnueg Fleisch hets denn geh und chli d’eau
Am Nachberstisch isch nemmli ganz e interessants Senioregrüppli ghocket,
Französisch hends gredet und spöter mit de Tammy e Konversation grocket (lol)
D’Tür im Restaurant het eus fascht fertig gmacht,
de Bisiwind het nemmli d’Antarktischälti inebracht
D‘Kellnerin isch chli verwirrt gsie mit eusne Bstellige,
debii hend mir eifach nur eis Fröschli nachem andere welle Bstelle
Lustig gha hemers mit Spieli und ere erfundene Kaktusgschicht,
gröölt hemmer und gfunde, mengmal sind die einte nid ganz dicht
Als Krönig het eus Jessi ihri unheimliche Guetnachtgschichtli welle verzelle,
wo eis oder s’ander Tränli gflosse isch, wobii sie das doch gar nid het welle
Warm under de kuschlige Decki sind denn all go pfuuse,
e isch so schön suuber gsie, dass sich gar niemert het mösse gruuse
Am Sunntig het s’Ufwache enere Sauna gähnlet,
aber immerhin het niemert meh wege gruslige Gschichtli tränlet
Nacheme riichhaltige und fantastische Z‘Morge,
hend mir eus warm und gsättigt gfühlt und au geborge
Nid so wie dusse, wo’s gschiffet het wie nüt –
aber glich hemer eus uf de Tag gfreut mit dene dolle Lüt
Hend eus uf de Weg gmacht mit Wanderstöck und Musig,
s’isch lustig gsie aber ebe au biz grusig
De “after-look” vo üs nach de Wanderig vo Alpiglen bis Grindelwald,
isch nid grad prickeld gsie aber so isches hald
Euses Ussehe het emne früsche Bad mitsamt Chleider gliche,
drum simmer acho im Dörfli schnurstracks ines Resti usgwiche
Die einte sind so patschnass gsie, dass uf d’Shoppingjagd sind,
und sich hübschi Souvenir Pullis gönnt hend und sich umzoge hend – ganz gschwind
Im Resti hemmer denn nid nur euse Z’Mittag gnosse,
dank de Laura ihrere Wiiberatig, isch grad namal chli Alkohol gflosse
Gspiese hemmer mit em Tina Törner Sound,
und eusi Stimmig isch nüme lost gsie sondern found
Tammy het spontan e Tättu session mitme Edding agrisse,
und wo sogar die legendäri Servierdüse aneghebt het, hets üs verrisse
Mit de Miggi und ihrem neu gwunnene Regeschirm simmer all uf d’Heireis,
und hend mit vill Wii Unrueh gstiftet und gmacht chli Mais
Jensti Mal bim falsche Gleissektor und eimal vo A nach H renne mit de Adilette,
was füren Stresssprint, naja, s’Lebe het hald immer mehreri Facette
De abschlüssend Löwespass in Wisi het nid dörfe fehle,
und wiiteri Tättus womer het chöne uswähle
Chli usklinge mit em eint oder andere Stiefel voll Bier,
und als letzti Destination bim Robin es Spieltournier
Ich würdi sege das Wuchenend isch en volle Erfolg gsie, (thanks Marina)
schad isches amel so schnell wieder verbi
Mir freued üs all ufs negste Jahr,
mir sind hald chlini Abentürer, das isch klar
~ Peace out, Tammynem
